ბოლო რამდენიმე წლის განმავლობაში სპორტის ისეთი სახეობებით დავინტერესდი, სადაც ზედმეტი სირბილი და გაოფლიანება საჭირო არაა, ისეთები, როგორიცაა ბილიარდი, ბოულინგი, გოლფი და სხვ. ბილიარდს წელიწადზე მეტია ვთამაშობ, მინი გოლფი ბავშვობაში მითამაშია, ჯერ კიდევ მაშინ, როდესაც „ვაკის პარკში“ „გოლფ კლუბი“ იყო გახსნილი. ამჯერად კი ბოულინგის ჯერი დადგა.

ბოულინგი “თბილისი ცენტრალში”

ორიოდ დღის წინ კი „თბილისი ცენტრალში“ გახსნილი ბოულინგ კლუბს მე და ჩემმა ძმაკაცებმა მივაკითხეთ, რომლის შესახებაც თაასგან შევიტყვე – Tbilisi Central Opening. საღამოს 11 საათი იქნებოდა, ამ დროს კი ფასები ყველგან და ყველაფერში მატულობს ხოლმე, ამიტომაც მხოლოდ ერთი საათი შევძელით იქ გაჩერება.

თამაშის დაწყებამდე სპეციალური ფეხსაცმელები გადმოგვცეს, რომელიც იატაკს იცავს დაზიანებისა და ნაკაწრებისგან. მას საგულდაგულოდ რაღაც აეროზოლი “მიაშხურეს”, რომელიც ალბათ ფეხსაცმელს სუნისა და სოკოს გადადებისგან იცავს. ეს ფეხსაცემელები ასე გამოიყურება:

ბოულინგის ფეხსაცმელები(ბანჯგვლიანი ფეხების ფოტოსთვის ბოდიში მომითხოვია :D )

მიუხედავად იმისა, რომ კეგლების „დამწყობი“ აპარატი (სამწუხაროდ ზუსტი სახელწოდება არ ვიცი) ხანდახან ჭედავდა და კეგლების დალაგებას აგვიანებდა ხოლმე, ხოლო ანგარიშის ტაბლო დრო და დრო რესტარტდებოდა და ქულები ხანდახან არ გვემატებოდა ხოლმე, თამაშისგან მაინც უდიდესი სიამოვნება მივიღე.

ძალიან მაგარი შეგრძნებაა, როდესაც დაახლოებით 30-40 მეტრიანი მანძილიდან ერთი გაგორებული შარით პირველად წააქცევ კეგლს, როდესაც პირველად აიღებ Strike-ს (1 გაგორებით ათივე კეგლის წაქცევა) და როდესაც პირველად მოიგებ ერთ გეიმს.

მე კი „უბედური შემთხვევის“ გამო ადგილზე სათვალეს გამოვემშვიდობე, ლინზებიც არ მქონდა გაკეთებული და ასე „ბრმად“ მომიწია თამაში. 4 გეიმის განმავლობაში 2 Strike გავაკეთე და რამდენიმე Spare (2 გაგორებით ათივე კეგლის წაქცევა) და თითქმის ყველა ხელი ჩემი გამარჯვებით დასრულდა.

თამამად შემიძლია ვთქვა, რომ პირველ თამაშს კრახი არ განუცდია და შესანიშნავად ჩაიარა. სავარაუდოდ სხვა ბოულინგ ცენტრებსაც მივაკითხავ უახლოეს მომავალში, რათა ამ უკანასკნელს არსებული სიტუაცია შევადარო, მანამდე კი ცოტას თამაშის წესებისა და რჩევების შესახებ გიამბობთ.

„თბილისი ცენტრალში“ არსებულ ბოულინგ კლუბში ფასები შემდეგნაირად არის გადანაწილებული:

  • 1 სთ – 14 ლარი 03:00 სთ-დან 14:00 სთ-მდე
  • 1 სთ – 24 ლარი 14 სთ-დან 20:00 სთ-მდე
  • 1 სთ – 38 ლარი 20:00 სთ-დან 03:00 სთ-მდე

შაბათ-კვირას კი:

  • 1 სთ – 24 ლარი 03:00 სთ-დან 20:00 სთ-მდე
  • 1 სთ – 38 ლარი 20:00 სთ-დან 03:00 სთ-მდე

თუმცა 1 გეიმის ფასი 4 ლარს შეადგენს.

აქვე გეტყვით, რომ ჩვენ 4ნი ვიყავით და 1 საათის განმავლობაში მხოლოდ 4 გეიმის თამაში მოვასწარით, რაშიც 38 ლარი გადავიხადეთ, მაშინ როდესაც შეგვეძლო გვეთამაშა 4 გეიმის მიხედვით და გადაგვეხადა 16 ლარი. ასე რომ თქვენც გაითვალისწინეთ თუ რა ტარიფით გსურთ თამაში.

თამაშის წესები

ერთი გეიმი შედგება 10  ჩარჩოსაგან (Frame), სადაც იმ ქულების რაოდენობა იწერება, რამდენ კეგლსაც წააქცევ. თამაშის მთავარი პრინციპი მაქსიმალური ქულების დაგროვებაა. მოთამაშეები 2-2-ჯერ აგორებენ შარებს. სულ მათ 20-ჯერ (10 ჩარჩო გამრავლებული 2 გაგორებაზე) მოუწევთ შარის გაგორება.

თუ თქვენ 1 გაგორებით 10-ვე შარი წააქციეთ, მაშინ ეს Stike-ია და თქვენ გემატებათ 10 ქულა + იმ ქულის რაოდენობა, რამდენსაც შემდეგი 2 გაგორებით აიღებთ.

თუ თქვენ 2 გაგორებით წაქციეთ 10-ვე შარი, მაშინ ეს Spare-ია და თქვენ გემატებათ 10 ქულა + მომდევნო ერთი გაგორებით მოგროვილი ქულა.

Strike ანგარიშის ტაბლოზე აღინიშნება X-ით (იქსით), ხოლო Spare /-ით (დახრილი ხაზით).

Bowling მოკლედ თქვენ ზედმეტი ქულების თვლა არ დაგჭირდებათ, თქვენს მაგივრად კომპიუტერი დაითვლის და ეკრანიდან შეიტყობთ თქვენს ანგარიშს და სვლას.

განსხვავება არის შარების წონასა და ნომრებში. ძირითადად 6-დან 14 ნომრამდე (თუმცა 6 ნომერი 6 კილოგრამს არ უდრის) მერყეობს შარები. მიღებულია რომ შედარებით დაბალ ნომრიან შარებს ხმარობენ ბავშვები, საშუალო ზომის შარებს ქალები, ხოლო დიდებს – კაცები.

პირადი გამოცდილებიდან 10-11 ნომრის შარი საუკეთესოა, არც ზედმეტად მძიმე და არც მსუბუქი. სწორედ ამ ნომრების მქონე შარებით ვთამაშობდი და ვიღებდი სთრაიქებს, თუმცა თქვენთვის შესაძლოა სხვა ნომრის მქონე ბურთულა უფრო მოსახერხებელი აღმოჩნდეს. ყველაფერი გემოვნებაზეა დამოკიდებული.

გარდა ამისა მინდა ერთი რჩევაც მოგცეთ შარის გაგორებისას, ეცადეთ, რომ რაც შეიძლება მშვიდად იყოთ ამ დროს. არ არის საჭირო მთელი ძალ-ღონით ბურთის გაგორება, აქ მთავარი სიზუსტეა და არა სიძლიერე. რამდენჯერაც ძლიერად არ გავაგორე შარი, იმდენჯერვე ბილიკიდან გადაგორდა, ხოლო რამდენჯერაც მშვიდად და აუღელვებლად ვითამაშე, იმდენჯერვე მაქსიმალური შედეგი მივიღე.

მოკლედ გისურვებთ წარმატებებს ბოულინგის თამაშისას. და თქვენ თუ გითამაშიათ ბოულინგი, ან გაგჩენიათ სურვილი სამნახვრეტიანი შარით კეგლების წაქცევისა? რა გამოცდილებას გაგვიზიარებდით? : )